唔鬧人的導演 (2019-04-04)

上星期出席了「香港公共關係專業人員協會」的周年晚宴，會上邀請了電影《逆流大叔》新晉導演陳詠燊(Sunny、圖右)作主講嘉賓。他巨細無遺地講述作為一個導演如何在拍攝期間做到面面俱圓，令到團隊每個人都心甘命抵地為電影(其實係為導演)去工作。其中Sunny道出了他八面玲瓏的精髓：「喺我心目中，冇一個人係絕對的壞人，只係因為佢地有缺陷，做唔出個效果。」正因為有此心態，他從不鬧人。他說在拍《逆流大叔》時，有一晚深夜搭的士返家途中，接到副導演的手機短訊：「導演，對唔住，頭先拍扒龍舟最後一個鐘嘅片全部用唔到，因為拍錯咗方向。」Sunny也直言，好彩是短訊，無人可以察覺到他刻下的驚恐與憤怒，他冷靜過後以文字回覆：「唔緊要啦，聽日再拍過。」他更以何其正面的心態去解讀：慶幸第二日都是在同一場景拍攝，補到飛，如果已經離開了場景，就真正大件事！也正正因為他一句責備的說話都沒有，副導演及整個團隊第二日仆心仆命地去「補鑊」；他又分享說，試過一次與演員面試時，坐他隔籬的同事雞啄唔斷地跟演員解說劇情，漠視導演的存在，但Sunny也沒有發火。後來這位同事在製作團隊中發揮了最大作用，為Sunny找了一個極難找到的場景，這刻Sunny發現這位如斯長氣的同事，才是最賣力、最緊張工作的一位，只不過他溝通能力差，才會營造出一個如此不濟的表徵。